Flamenco

Rodipe

Gonzalo Montaño Peña

O Antonio Mairena: Shirdjas O Nevoklasikano Vaxt Ando Flamenkikano Gilavipen

O Antonio Cruz García, “Antonio Mairena”, Rrom, gilavno, rodjarno, lekhavno aj godjarno bjandiljas ando bersh 1909 andi Mairena del Alcor, Sevìla.

Lesko djivipen aj leski buti keren jekh fundamentàlo jacho ando rodipen aj ando hakjaripen kotar i pashutni història kotar o Flamènko aj kotar o Espanikano Rromano Them

unknown | Antonio Mairena Golden Key of Flamenco | fotografija | Espania | 1962 | fla_00259 Licensed by: Antonio Cruz Madroñal | Licensed under: Rights of Use I Provided by: Fundación Antonio Mairena (Sevilla/Spain)

O Antonio Cruz García, “Antonio Mairena”, Rrom, gilavno, rodjarno, lekhavno aj godjarno bjandiljas ando bersh 1909 andi Mairena del Alcor, Sevìla.

Lesko djivipen aj leski buti keren jekh fundamentàlo jacho ando rodipen aj ando hakjaripen kotar i pashutni història kotar o Flamènko aj kotar o Espanikano Rromano Them

O tolipen kotar leski bari buti na agòrdel andi muzìka: lesa shìrdel jekh trag savo prapuchel o barikanipen te ovel Rrom, so thanjarel o rromipen sar xaing kotar baro barvalipen aj ròdel andi història te djanel o nakhlipen akava themestar. Akava dikhipen influenzisardjas but rromane artisturienge leski vaxteste kon lènas brekhe akaja filosòfia aj akava puchipen ando keripen lenge butjende so anel jekh prapuchipnasko genèro vasho rromipen kotar verver artistikane chanda (muzikake, teatroske ja literaturikane).

Sa adava dikhavel pes vi ando sociàlo nivèli aj influenzisardjas ande avdine lidèrurja kotar o prapuchipnasko trag kotar e Rromano Themeske hakaja so ondilo ande bersha 1970ke aj katar biandjljas o avdivesutno rromano asociaciako trag andi Espànja.

Te dikhas numaj pi leski muzikàlo buti, sar gilavno mukhljas jekh biagorutno aj pramishto artistikano palmukhlipen. Jekh buti respash arxeologikani thanjardi ando lestravipen, ando rendaripen aj andi registràcia kotar e rromane gilavimàta, varesave telo meripnasko ziandipen. Leski buti thanjardjasas e bàza kotar odova so avdives si hakjardo sar ortodoksikano Flamenkikano Gilavipen.

Nane aj nas jekh aver gilavno kon mukhljas jekh buti odobor sasti aj odobor artistikani kualitetasa sar odoja so mukhèlas o Mairena.

O Antonio Mairenako artistikano sikljaripen shìrdel, sar ande maj buteder kotor kotar e rromane artistùrja, peski familjate. Xànri po xànri, sas djangavindoj pes leste jekh biagorutno prakamipen e gilavipnaske, savo achel leste barabare zorjasa dji ko lesko meripen. Dindjas leske pachimàta pe lila, konferèncie, rekordàcie aj metodùrja kàste pradjiven lestar mashkaral jekh godjipnaski skòla so vov akhardjas “mairenìsmos”.

Aj sar phenel o kritìkarno aj sikljarno kotar i flamenkikani muzìka o Manuel Martín Martín:

“Si jekh iripen e klasikende, aj si les jekh vazdjardo didaktikano aj moràlo karaktèro, sostar odova so simbolisarel. Sas anavjardo sar nevoklasikano Flamènko, hakjarindoj les sar o trag so del anglunipen e djantripnaske anglal e efektoske, odova so rajarel thamja kaste mushaj te aven phande e gilavimàta aj, agoral, odova so, somchivindoj i ritmikani simètria e ekspresivikani eleganciasa ta o interpretativikano kataipen, ovèlas jekh modèlo te avel kramavdo.”

Manuel Martín Martín
unknown | Mairena singing the day he was distinguished as "honorary son" | fotografija | Espania | 1982 | fla_00260 Licensed by: Antonio Cruz Madroñal | Licensed under: Rights of Use I Provided by: Fundación Antonio Mairena (Sevilla/Spain)

Madikh so, akava aksiòma trebal te avel dusljardo mashkaral verver somtrujensa ondile lesko djivipnaste; varesave avile leste aj aver sas biande e “Mairena”tar:

Mashkar e anglune, si trin vastne divesa: o bersh 1928, kana, sar vov mothovdjas, ondjol jekh trascendentàlo ondipen ando lesko gilavipnasko siklavipen: o Diego de Brenes (Antonioski familjatar), andi jekh vizìta peske amalensa, arakhèlas leske varesave na-prindjarde gilja kotar o “El Nitri” (1838–1877) so lèlas leski godjate sar i bareder mandjin. Kadial, okonatar, sikljòlas so lestravindoj gila respash xasarde ka molkucherel pesko artistikano drom, jekhvaxte so lestravèla lenge e historiake.

Jekh djenutni manglin te lestravel, te lachjarel aj te rendarel e bazikane struktùre kotar o Rromano Flamenkikano Gilavipen.

Shìrdel, adala premisasa, jekh djenutni manglin te lestravel, te lachjarel aj te rendarel e bazikane struktùre kotar o Rromano Flamenkikano Gilavipen. Jekh buti kaske phandèlas pes vi trupesa vi ogjasa, kerindoj jekh chachikano gilavipnasko manuàlo e avinde generacienge.

O dùjto aj o trìto dives avènas solduj sar pativake prindjarimàta: Pativalo Direktòro kotar i Flamenkologiaki Katèdra kotar Jerez de la Frontera (1959) aj o denipen kotar i “Somnakuni Klidji e Gilavipnastar” (1962).

Okonatar, o Antonio Mairena, aba dikhlo sar maestro (sikljarno), djamavel peski buti sar jekh apostòlos jekh kramesa kotar projektùrja save kerde lungone pesko djivipnaste:

“Mundo y Formas del Cante Flamenco” (Shundal aj chanda kotar o Flamenkikano Gilavipen)

Pativjardo e Gilavipnastar Sumnakuni Klidjasa, o Antonio Mairena arakhèlas pes basutni autoritatasa te del avri pesko Flamenkikano evangèlio. Odobor bersha kotar rodimàta umaljate aj muzikalone virkerimàta, musaj te oven dine ando jekh traktàtus so sevèla e shundaleske te djanel o shumbjopen kotar o Flamenkikano Gilavipen. Uzal thanjarel o anavipen Cante Gitano Andaluz (Andaluzikano Rromano Gilavipen) te anavjarel i muzìka kotar e Rroma ando Flamènko.

Odoleske labjardjas jekhe patrinjengo profesionàlo basutne xacharipnasa aj kamipnasa. Arakhljas les ando poèto Ricardo Molina Tenor. Khetanes lekhlènas i pustik “Mundo y Formas del Cante Flamenco” so sas dino avri kotar i Revista de Occidente (Zhurnal kotar Ratjorig) ando bersh 1963.

Festivàli Kotar Cante Jondo (Xor Gilavipen) “Antonio Mairena”

Ande Flamenkikane festivàlura so ingjarènas ando shirdipen kotar e bersha 60 kotar o nakhlo shelibersh, o Antonio Mairena arakhel i rendutni avlin kaj sikavel, saste zorjasa aj pativjasa, e Rromane gilavipen, bashavipen aj khelipen.

“La Antorcha Del Cante” (O Gilavipnasko Udud)

Kana sas kerdo o festivàli, o avutno padmad sas te organizisarel jekh gilavipnasko konkùrso (pradikhlo, duzles, kotar o xod Antonio). I jèkhto pursak kotar o jèkhto “Konkùrso kotar Cante Jondo (Xor Gilavipen)” sas e Juan Peñake “El Lebrijano”. Madikh so, o sikljarno kotar Los Alcores kamàvas jekh verver kotar e aver achadutne konkùrse, aj, odoleske, kerèlas i “Antorcha del Cante”.

“La Gran Historia del Cante Gitano Andaluz” (I bari història kotar o Gitano-Andaluzikano gilavipen)

Palal te dindjas avri jekh pustik e Antonio Maireneske teoriensa po sumbjopen aj pi bàza kotar o Flamenkikano Gilavipen, sas te mukhèlas bashikano seripen odolatar, palal jekh djivipen dino e lestravipnaske aj e restauraciake e gilavimàtendar. Thaj akava sas so ingerdjas dji ko agor e registraciasa kotar i buti “La Gran Historia del cante Gitano-Andaluz (I bari historia kotar o o-Andaluzikano gilavipen”, somchivdi kotar trin LP aj dini avri kotar o diskografikano kher Columbia ando bersh 1966. Akaja butjasa kamljas te mukhel sikavdo o gilavimatengo ortodoksikano drom e avinde gilavnenge generàciengere.

Pativ e Sikljarnenge

O Antonio Mairena djanèlas so leski Flamenkikano Gilavipnaski khangeri musaj te dindjas angali e tasvirja ta e ikonùrja save simbolizisarènas en vasne bàza pe savendar vov tordjardjàsas lesko Flamenkikano gindo: “o mairenìsmos”. Odoleske brigarèlas pes te shajarel – e pativjasa, anavjarindoj ulichenge ja vazdindoj skultùre – o kamipen kotar o fan karing okola ikonurjenge.

Kadial, o Joaquín el de la Paula, Manuel Torre o Diego del Gastor aj sheral i “Niña de los Peines” sas pativjarde aj kamle sa e chachipnasa so akala bare manusha kotar o Flamenkikano artja trebànas. Odobor vasne andi andaluzikani kultùra shaj te oven o Falla, o Lorca ja o Murillo sar i Pastora Pavón, i “Niña de los Peines”.

O Flamènko Andi Universitèta

Jekh kotor e intelektuàlo shundalestar – sheral paleder i 27ki Generàcia – sas interesisardo ando garavdo Flamenkikano shundal aj varekana andredinjas akaveste; ja pashavindoj e xaingenge ja akharindoj artisturenge ande lenge kulturikane divànurja.

O Antonio Mairena hatjardjas so, sùrte i kulturikani elìte xatjarèlas o Flamènko sar kulturàlo barvalipen, pirdal o folklòre, adava te ikljarèla zorjardo andi leski pativ aj ando lesko artistikano nivèli.

But Flamenkikane artìsturja nakhle e Universitate te vakeren po Flamènko ja te gilaven àma o Antonio Mairena hatjardjas so, sùrte i kulturikani elìte xatjarèlas o Flamènko sar kulturàlo barvalipen, pirdal o folklòre, adava te ikljarèla zorjardo andi leski pativ aj ando lesko artistikano nivèli; jekhvaxte so te djangavèla o interèsi e universitataqe ternende save palal ka len e bare posìcia andi societèta. Lesko vastelipen ande akala divànurja, sar vakerno ja sar gilavno khetanes butprindjarde flamenkològurja, sas butvarno katar e bersha 1960.

Sar agorutno ondipen kotar lesko kamipen te anel o Flamènko ki durukh ondjolas ando bersh 1963, ando Paranìnfos kotar i Sevilikani Universitèta, kana dikhljas, phukjardo, i Niña de los Peines beshti, andi prezidenciàlo mez, khetanes e Pramishto Univesitatako Prabeshtosa. Odova simbolisardjas leske o sociàlo aj kulturàlo prindjaripen e Rromano/Gitano Gilavipnaske.

O Flamènko Ande Nevimatenge Mèdie

O godjaveripen kotar o Antonio Mairena kerèlas pes so pustika, dìske, festivàlia, divànurja aj konferèncie te buderèna o mol sùrte oven projektisarde mashkaral e komunikaciake mèdie. O buxljaripen kotar o Flamènko mashkaral e jurnàlurja, i ràdio aj i televìsia sas but vasno e sociàlo xatjaripen.

Odoleske o sikljarno Mairena shajardjas o pashanipen kotar e mèdie dji ke Flamenkikane ondimàta: festivalenge transmisiònurja, radioske divànurja thaj kòla.

Skulturako Seripen E Baro RRomango/Gitano Gilavipnaske

O Antonio Mairena dindjas pesko djivipen ando maripen vasho jekh godjipen so vov kerdjas prakamipnasa, pachandoj so andre o flamènko si jekh gilavimatengo kram so, historiatar aj evoluciatar, sas kotar jekh tikno kotor e Rroma Andaluziatar. Akala gilja sas kerde andre gilavnenge famìlje kotar i telutni Andalùzia. Akate pheren e shtar bazikane gilja: Tangos, Tonás, Seguiriyas aj Soleares. Akava arxetìpo sas materialisardo sar godli e shundaleske kana sas tordi jekh seripnaski skultùra e baro Rromano/Gitano Gilavipnaske, shirdini andi Mairena del Alcor (1968). O Antonio Mairena djivel pesko maj barvalo vaxt aj, soske vov djanel aj shaj, khonik puchel lestar i chepàni kotar o Flamènkikano gilavipen.

Flamenkikano Artjako Kher

O maj lacho than te gundjarel o maj uzheder Flamenkikano artja (uzho ando mandaj sar uzhjardo aj bi zlagiensa) si Antonio Mairenake i peña flamenca (flamenkikano klùbo). Xatjarindoj akava sar o rendutno than te dikhel aj te shunel chaches aj pherdo xatjaripnasa mashkar o artìsta aj o dikhintro. Vi sas dikhlo sar o malado than te vakerel, ande djivde divànurja, e verver godjimatensa po Flamènko. Odoleske o Antonio promotisarel o keripen kotar peñas (flamenkikane klùbe), save budaren pen andi sasti flamenkikani geogràfia.

Lache ilesa acharel te aceptisarel e akharimàta adalendar, djanglo so lesko avipen si fundamentàlo te zoriarel len; aj, sar na te avel aver, ando lesko gav thanjarel pes jekh peña so vov lèlas sar kirvani chaj aj boldel la e anavesa Casa del Arte Flamenco (Flamenkikano Artjako Kher) ando bersh 1971.

Avtobiogràfia

Sas duzlo e Antonio Mairenake so leski biogràfia sas te avèlas lekhli lestar. Lesko projèkto nashti achel ande vasta kotar biogràfura kon na resen te hatjaren o vogi kotar lesko Flamenkikano djantripen. Na kamèlas te mukhel khanch e interpretacienge opretele lache kamipnasa. Kadial, aj sar kerdjas peski pustikasa “Mundo y Formas del Cante Flamenco”, rodljas o malado lekharno kàste lekhèlas lesko seripen. O alosardo lekhavno sas o giljarno Alberto García Ulecia kon, sar mothovel ande leske “Djanavimàta”, numaj “lekhljom so vov mangèlas te avel lekhlo ande akala lila”.

“E lachjarimàta so me mushaj te kerdjom ande varesave kotar leske djivde lava sas numaj morfologikane, miri godjasa pacavni e avtoresko godjipen aj numaj e kamipnasa te shajarel e drabarneske i komunikàcia aj o hatjaripen.”

I avtobiogràfia sas anavjardi “Las Confesiones de Antonio Mairena” (E Pukjavimàta kotar o Antonio Mairena) aj sas dini avri ando bersh 1976 kotar i Universitèta kotar Sevìla.

Palmeripnaski Buti

Sar referenciàlo ondipen, ko sikljarno Mairena –o manush kerdilo gilavipen– aresel les o meripen andi sasti testimoniàlo aktivitèta aj mekindoj duj palmeripnaski butja: jekh pustik, “Joaquín el de la Paula. Gran artífice del cante por soleá de Alcalá” [O Joaquín el de la Paula. Baro kreatòro kotar o gilavipen ando Soleá de Alcalá] (1984) aj jekh dìsko, “El calor de mis recuerdos” [O tatipen kotar mire serimàta] (1983).

Lensa, aj dikhjol pes sar jekh anglaxatjaripen, pherel sasto o berno kotar jekh djivipen aj jekh phendli. I pativ ko lesko angluno sikljarno aj brakhno thaj o basaduno mothovipen kotar e bareder Rromane Gilavimàta. Vi sas les pe vasta jekh lila refleksiensa po djivipen aj buti kotar o Manuel Torre thaj, lesko bareder projèkto, o Antonio Mairenako muzeum.

Adachande, lende, khrigal te mothovel lesko kamipen kaske djàlas o lil, acharèlas te lekhel vi leske godja aj kamimàta e Flamenkosa.

Agoral si but vastno lesko epistolarium. Savaxt kamèlas zorales te lekhel lila peske amalensa aj fanurensa, sar naisaripnasko micharipen; jekhvaxte, djangljas so akala lila paleder avènas avridine. Adachande, lende, khrigal te mothovel lesko kamipen kaske djàlas o lil, acharèlas te lekhel vi leske godja aj kamimàta e Flamenkosa.

Palal peske artistikane prindjarimàta si respas bishajutno te ginel sa e pursaka aj medàlje so sas dinde leske vi ando lesko djivipen vi palal o lesko meripen. Odoleske numaj liparas odola pursuka save, sostar si len bareder institucionàlo mol, nashti te bistras:

  • Pativalo Direktòro kotar i Flamenkologiaki aj Andaluzikane Folklorikane Siklovimatengi Katèdra kotar Jerez de la Frontera (1959) (khetanes 8 pursukensa maj dine len kotar i vipal Katèdra ande kramavde bersha)
  • IIIto Llave de oro del Cante – Gilavipnaski Somnakuni Klidji – (1962)
  • Brekhelino Chavo kotar Sevìla (1979)
  • Rupuni Medàlja e Butjako Molipnaske (1980)
  • Prakamlo Chavo kotar Mairena del Alcor (1981)
  • Somnakuni Medàlja kotar e Shukar Artja (1983)
  • Prakamlo Chavo kotar Andalùzia (1983)

Rights held by: Gonzalo Montaño Peña (text) — Nicolás Jiménez González (translation) | Licensed by: Gonzalo Montaño Peña (text) — Nicolás Jiménez González (translation) | Licensed under: CC-BY-NC 3.0 Germany | Provided by: RomArchive