Literatura

Rodipe

Martin Zingg

I djiljarni Mariella Mehr

Ayse Yavas | Mariella Mehr | fotografija | Švajco | lit_00636 Rights held by: Ayse Yavas | Licensed by: Limmat Verlag | Licensed under: Rights of Use | Provided by: Limmat Verlag (Zurich/Switzerland)

Ane publikaći percepcija i Mariella Mehr ašundili maj but sar autorka katar prozaće buća – ali paša pire but novelura, teatrose kotora thaj reportaže voj isto ramosarda jek buhlo thaj autonomno lirisko delo. Dži adjives (2018) publicirisarda voj štar poezijaće knjige, thaj paša sa kodja vi poezija ane žurnalura thaj ane antologije.

Ano breš 1983 – duj breša pala lako angluno novelo »steinzeit« (1980) – iklel vi e Mariellaći angluni poezijaći knjiga: »in diesen traum schlendert ein roter findling. gedichte«. E poemura si but diferentni pe sama pire formaći thaj pire temendji. Uni poemura ćeren impresija, te pipisaren thaj te roden vareso.

Mariella Mehr | [Gedicht ohne Titel 1] | poemo | lit_00062 Rights held by: Mariella Mehr | Licensed by: Zytglogge Verlag | Licensed under: Rights of Use | Provided by: Zytglogge Verlag – Publishing House (Bern/Switzerland)

I knjiga inkludil poemura, sae thon bari importanca pe sajekh separatno vorba, thaj korkoraren la, vi e intencijasa te phenen but zala svatonca. Ano kontrasto, aver poemura buhlon bute svatonca. Von bolden-pe ka jek 'Tu', kase mandjen te paćan, thaj roden jek čhib, ane saji godo paćavipe inćerdol.

Ano breš 1998, pala breša, kana i Mariella ramosarda sa maj but proza, iklilo lako dujto poezijako lil: »Nachrichten aus dem Exil: Gedichte / Nevipe andar o exilo: Gila«. Dži kodo, pala varesae fizički atake, i autorka djeli sas ande Italija thaj trajinda but breš ane Toskana. Adjives voj palem trajil thaj ćerel bući ani Švajcarska.

Ane pire djilja, i Mariella Mehr mothol numa indirektno pala pire eksperiance, sae trade la ano eksilo. Ane djilja haćardol na numa i dukh, nego pale thaj pale vi i loš andar nevi okolina thaj i voja te ćerel neve eksperiance.

E poemura sikaven baro muzikaliteto, ritmo thaj slikaći zor, vi kothe, kaj von mothon garade svatonca katar dukhaće eksperiance. O specifiteto gasave knjigako si, kaj ikliste e poemura ane duj ćhiba: O Rajko Djurić nakhada i intrego poezijaći knjiga vi pe romani čhib.

Ane piro trito lil i Mariella Mehr džal maj dur pire presentacijasa ane duj čhiba. »Widerwelten / Ušalinake ljumi« iklilo 2001 štarvardeš-thaj-pandže djiljenca. Dešupandž lendar nakhada o Mišo Nikolić pe romani čhib. Ćerdol-pe, kaj ane godo lil e džuvdimasi zor thaj i voja, kaj varesar sesa još tipični ano lil anglal, ane dujto knjiga zala xasalji. Butivar o meripe si ano fokuso; o djinajitori haćarel jekh brigako thaj dukhako hango, vi ane čhib, saji naj paćamasi maj but.

Ano breš 2003 iklilo e Mariellako maj paluno poezijako lil, dži adjives: »Das Sternbild des Wolfes. Gedichte«. I knjiga inkludil 75 poemura, ali numaj pe njamcicko čhib.

Ane goja knjiga i autorka džuvdisarel palem e diverzni tonose modura thaj e diferentni teme katar e duj anglune lila. Akathe i loš pašljol paša i dukh, i revdija paša i frustracija. E ekstremno zurale metaforenca i Mariella Mehr thol gaći e diverzni haćarimata ane intensivni relacije. Gova ćerel laće djilja gaći impresivno.

Mariella Mehr | [Gedicht ohne Titel 4] | poemo | lit_00097 Rights held by: Mariella Mehr | Licensed by: Mariella Mehr | Licensed under: CC-BY-NC-ND 4.0 International | Provided by: Drava – Publishing House (Klagenfurt/Austria)