O Hristo Slavov Kyuchukov (Christo Slavov Kütchukov, Христо Славов Кючуков, Xristo Slavov Kjučukov) sî jeg bulgarijako muslimanicko Řom kaj bijandilo 1962 ando foro Provadia. Vov sî profesoro thaj priznajime eksperto po sektoro edukacija pala řomane śavořê thaj vi po sektoro řomani śib. Leskê specifično naučni thaj investigacijakê publikacije sî pa bilinguizmo, paj edukacija kata l’ Řom thaj kata l’ turkicka bêjatur ande Evropa, śibaki akvizicija, psixolinguistika, sociolinguistika, śiba ando kontakto, o genocido le Řomengo thaj anticiganizmo ande Evropa.

O Hristo sî avtoro, ko-avtoro thaj editoro bute lilengo thaj edukacijakê materialosko, kaj den dumo e edukacija řomane śavořê. Leskê maj importantni knjige sî la śibakê materijalur kaj ankliste ande Bulgarija, »Amari Romani Lumja« (1997–2001), kadale knjige prezentirin, maškar aver, řomane avtorur kataj antrego ljuma, thaj le knjige kaj ankliste ande USA pe englezicko śib »My name was Hussein«(›Muřo anav sas Hussein‹, 2004) thaj »A history of the Romani People« (›Jek historija kata řomano narodo‹, 2005) – kaća knjiga kêrdja la kethane le Ian Hancockosa.

Ando bêrš 1995 formirisardja o Hristo e Balkan Diversity Foundation pala trans-sektoralno kulturaki edukacija thaj relacija. Pala duj decenije sas kaća fundacija o maj importantno than palaj produkcija thaj publikacija kata řomane śavořengi literatura ande Bulgarija thaj kata řomane avtorongê publikacije.

O Hristo angažirisajlo vi sar nacionalno thaj internacionalno řomano aktivisto thaj sas maškar le bêrš 2000 thaj 2004 generalno sekretari kataj Internacionalno Romani Unija (IRU).

(Translacija: Mozes F. Heinschink)

Alome Bibliografija

Kjučukov, Xristo. 1997. Amari Romani Lumja. 1 kotor, Romane poeme e tikne čavorenge. Sofia: Бизнес Бридж [Biznes Bridž].

Kjučukov, Xristo. 2000. Amari Romani Lumja. 2 kotor, Romane paramisa e tikne čhavorenge. Sofia: Tilia.

Kjučukov, Xristo. 2001. Amari Romani Lumja. 3 kotor, Romane gilja e tikne čhavorenge. Sofia: Iktus.

Kjučukov, Xristo. 2001. Amari Romani Lumja. 4 kotor, Romane giogjaver thaj
garavde lava. Sofia: Iktus.

Kjučukov, Xristo. 2002. Me ginav dži ko deš. Sofia: Iktus.

Kyuchukov, Hristo. 2004. My name was Hussein. Honesdale: Boyds Mills Press.

Kyuchukov, Hristo and Ian Hancock. 2005. A history of the Romani people. Honesdale: Boyds Mills Press.

Kyuchukov, Hristo. 2010. Textbook of Romani Songs. München: Lincom Europe.