O Hans Dhamo Caldaras sasa bijamo ande Stockholm ko 1948-to berš. Vov barilas ande Romane kampura, phirindoj peskere dejasar thaj phralesar trujal o Švedo. Kana sasa deše beršengo vov avgo data gelas ande škola. Ki vrama kotar e 1960-tone berša, vov marelas pes vaš e Romane hakaja leskere dajekre kuzinkasar e Katarina Taikon-asar thaj e Thomas Hammarberg-esar.

Kotar kodi vrama vov sasa aktivisto vaš manušikane hakaja thaj pe jekh vrama kerelas pesky profesionalno buči sar aktero thaj sikavno. O Calderas sasa o avguno Romano artisto ando Švedo savo so kerdas LP record vaš Sonet, tradicionalno gilencar pe Kelderaš dijalekto. Ko 2002-to berš, vov kerdas autobiografija, I betraktarensögon (»Ande jakha kotar manuša«), so sasa publicirimo vi ande Romaniaki čhib teli o alav Privirea Celuilalt (2011), savo so dela jekh dikhipe upral e historija katar e Kelderaš.

Ko 2002-to berš o Calderas sasa alusardo sar membro ande Švedicko Pen Club. Kotar 2007-to dži pe 2011-to berš, sasa direktoro ande Romano Kulturako Centro ano Stockholm. Kotar 2007-to dži pe 2010-to berš, vov sasa member ande gavernoski Delegacija vaš Romane Phučipa, thaj ande 2012-to vov sasa jekh kotar e internacionalno Romani Eldersinitiative anoBerlin, savi so inicijativa sasa te vazdel pes Memorijalo vaš e Sinti thaj Romane Žertvi kotar o Nacional Socijalizmo. Ko 2016-to berš, vov sasa o avguno manuš so lijas o phursak/prizo Katarina Taikon Award, dendo kotar o foro Stockholm.

O Calderas regularno pharuvela lila pe Romani čhib thaj rekordirinela tekstura pe Rromani-chib vaš CD, radio thaj TV. Pe nakhle berša o Calderas buteder kotar peski vrama nakhela marindoj pes vaš e hakaj pe Roma, save so majbut avile kotar Romani thaj Bulgaria, save so našle ande Švedo thaj pe javera thema našindoj diskriminacijatar.