Bijando ando o 1960-to berś ando o Prilep, Angluni Jugoslavijaki Republika Makedonija, ande e familija ekhe romane gilabavne dejake thaj dadeske tancioro, o Seido Salifoski barilo ando o Bronx, Nevo Jorko, turjaldino katar makedononi romani komunalno folk muzika. O Seido si akana globalno źanglo vaś pesko virtuozipe pe dumbek/tarabuka (vastuno davuli savo si sar bari taxtaj) thaj davulesko komplekto ande Balkanone thaj Maśkarune Khaminkline (Midlle Eastern) stilura. Sar cikno ćhavo, vov ni sas cirdino karing e davulesko baśalipe ama kadava aćhilo aver kana vov dikhla o filmo “E istorija e Gene Krupa-ke [The Gene Krupa Story]” kana vov sas efta berśengo. Vareso kerda klik kana vov dikhla o manuś kon khelda e Krupaki rolja sar vov perada peski rovljori, vazda la, atoska astarda te baśalel pe phuv źikana vov lagano la te baśalel palpale pe peske davulja. O Seido ka aćhelas ekh davulno, sar o Krupa. Vov astarda te baśalel pe bongura thaj po davulengo kompekto peske xispanone muzikalne amalenca, thaj eventualno kinda ekh tarabuka kana vov sas 16-ve berśengo, źikana vov kerda vizita peske papuske ando Xoraxanipe (Turkija).

O Salifovski sigo formirisarda ekh banda ando o Bronx dujenca katar peske phralenge ćhavenca (kozinonenca) – o aver Seido (Dzemaloski) po akordeono thaj o Kennedy Zekiroski po klarineto – von baśalen ka abjava, sunetonenge partita, thaj aver komunalne bare givesa sponsoririme katar e muslimanone romane makedonura, etnikane makedonura, thaj aver balkanone grupe. Kadava sas o astaripe vaś leski profesionalno baśalipenaski kariera. Vov reslo te sikjol muzika ando o Muzikalno Berklee Koleźo ando o Boston, vov barjarda peske xorizontura e dźazosa, latino, thaj aver źanrura. E Seido akana si les upral 40 berś de sar vov baśalel, thaj kerda buki pe scena thaj ande audioramosaripenata bute źangle muzikantonenca sar o Tarkan thaj o Omar Faruk Tekbilek katar o Xoraxanipe, thaj i o Theodosii Spassov, o Ivan Milev, o Yuri Yunakov, thaj o Ivo Papazov katar e Bulgarija. Sar vov lungonil te rodel peske radikalja (koraja) peske grupasa Romski Boji (Romane Farbe), vov thol andre i balkanoni muzika thaj dźaz e bandenca Balkan Peppers thaj Pradox Trio.

O Salifovski sikavda ande verver kampura thaj seminarja ande sa e Amerikake Kidinde Śtatura, sar o Darabukistan Independence Day, Penssic, Tribal Con, thaj o FolkEast European Folklife Center’s Balkan Music & Dance Workshops. Vov sikavel i privatno. O Salifovski si akana dad dujenge ande e Astorija, Foro Nevi Jorka, kajte vov źivdel (trail) peske romnjasa thaj peske terne ćhejasa, kon tancuil thaj baśalel po piano. Vov lośavol ande but devrjane avipenata (vizite) katar leski maj bari ćhej, kon gilabel, tancuil, thaj baśalel e violina.