E Lilyana Kovatcheva (Lili Kovacheva, Лиляна Ковачева [Liljana Kovačeva]) bijandili 1960 ande ‘k Erlisko familija ande ‘k řomaji mahala kata o foro Kjustendil, savo arakhadol po jugo-zapado la Bulgarijako. E Lilyana sas e angluji řomni ande peski komuna univerzitetockona edukacijasa, kaj promovirisardja ande ’k bulgarijakî edukacijaki institucija.

La Lilyanaki karijera telardja sar sîćaritorka thaj šêrutni ande ‘k primarno škola pala řomane śavořê ando Kjustendil. Pala kodja sas voj ekspertkinja palaj dejaki řomaji śib (2002-2006). Maškar le bêrš 2011 taj 2015 sas voj direktorka kata o centro palaj edukacijaki integracija kata śavořê thaj studentur kaj aven anda etnijakê minoritetur (Център за образователна интеграция на децата и учениците от етническите малцинства), sja kodja talaj sama kata bulgarijako ministerijumo palaj investigacija thaj edukacija.

De kata le 1990-utne bêrš angažîril pe e Lilyana pe l’ sekcije aktivizmo, netvorkingo, źuvljangê čačimata, investigacija kataj řomaji kultura, tekstongi formacija pala řomengê śavořê thaj pařuglimos kata taj ande řomaji śib. Voj ankaladja diferentni śibengê edicije kata peski knjiga »Rom knows the way« (2000) / »O Rom dzhanel o drom« (2001). Ande knjiga arakhadon biografije kata ašunde řomane aktivistur andaj antrego ljuma, kolekcija kata folkloro thaj investigacijakê artiklur.

Ando RomArchive šaj šunen jek intervjuo la Lilyanasa taj vi jek ginavimos la Lilyanako.

(translacija: Mozes F. Heinschink)

Biblijografija (Izboro)

Kovatcheva, Lilyana. 2000. Rom knows the way. New Delhi.

Kovatcheva, Lilyana. 2001. O Rom dzhanel o drom. New Delhi.

Kovatcheva, Lili. 2003. Shakir Pashov. O apostoli e romengoro 1898–1981 = Шакир Пашов. Апостолът на ромите в България 1898–1981: [Šakir Pašov. Apostolăt na romite v Bălgarija]. Sofia: Kham.

Kovačeva, Lili. 2008. Armanja. Baxtaljaripe. Paramisies. Sofia: Dimi 99.