E Fatma Heinschink (śejako anav: Zambaklı) bijandili ka 6. marto 1948 ando foro Izmir. Voj mêklja kaća ljuma ka 4. avgusto 2017 ando foro Vienna. Lako dad, laki dej thaj lakê parampapur sas Sepečides (Sevlengere Roma) anda regiono Saloniki, savo sas źi ka bêrš 1913 kotor kata osmanicko them. Ande l’ 1920-utne bêrš but źene kata lakê familije, sar vi lakê papur thaj lakê mamja našle ande Turkija, savi formirisajli tala Kemal Atatürk. Von arêsle po agor ando foro Izmir thaj krujal ande l’ Izmiroskê gava. Le familije, kaj aśile ande Grecija, maškar lende vi la Fatmakê njamur, munčisajle ando foro Volos.
La Fatmaki dej muli kana sas e Fatma inja bêršengi. E xurdi Fatma musaj sas palaj mortja peska daki te lel sama pe peskê phejakê śavořê, kê lakê pheja źanas ande bući. La Fatma te avelas la bari voja te źal ande škola te sićol, numa nas la šansa. Voj sićili korkoři te čitol thaj te ramol. Barja lošasa tholas kan pe l’ phurengê paramiča, djilja thaj pe l’ phurengê diskusije; kadja sićili intesivno o oralno tradirime tradicijako mangin peska familjako, peskê njamongo, peskê amalengo, haj laki serimaski zor sas fenomenalno. Pala mêritimos le Mozesosa F. Heinschink dokumentirindas voj pesko baro narativosko źanglimos pe maj but de 100 časonge audioskê snimkur. Ande kado kidimos kata l’ audioskê snimkur arakhadon sja le djilja, paramiča, xarane priče thaj biografijakê narativur kata peska komunakê membrur.
De kata o bêrš 1983 trajisardja e Fatma alternativno ando Beči thaj ando Izmir. Numa xancî źene anda laki, maj anglal bari śibaki komuna le Izmiroskê Sepečides źanelas sar voj e řomaji varijanta kata peskê prjapapur. Kaća laki řomaji śibaki varijanta perel tela »južno-balkanska« řomaja dialektur kaj šoha nas la kontakto la řumunijaka śibasa. Le palune 80-90 bêrš sas ekskluzivno e turkicko śib e kontaktoski śib kata Turkijakê Sepečides. Adjes kêrdjili e turkicko śib vi la daki śib kata l’ maj but têrne Izmiroskê Sepečides.