O Demir Aliev bijandilo 1930 ande Sofija/Bugarija. Već sar učeniko sas lo aktivno pe sama la politikaki thaj la literaturaki. Pala o gimnazijumo gêtosardja vov po univerziteto śibakê studije. Pala kodja astardja vov e sićarimaski profesija, 1959 kêrdilo školako inspektoro, thaj 1964 kêrdilo o direktoro kata ‘k elementarno škola. Kata o bêrš 1969 źi ka o početko kata l’ 1990-utne bêrš sas lo responsiblo pala jek stručno škola. Ande l’ 1980-utne bêrš porunčisardja o komunističko režimo, te khosen pe sja le turkicka anava; o Demir Aliev bušolas de atunčara ‚Dimităr Iliev‘.

De katar o bêrš 1989 kêrelas o Demir Aliev bući ande edukacijako ministerijumo thaj lja pe te kêrel projektur pa l’ řomaja śibako ramomos thaj paj kreacija kata sićarimasko materijalo pala řomane śavořê. Ando bêrš 1999 pařuglja vov le Puškinoski paramiči ›O somnakuno maśo‹ ande pesko řomano dialekto, kaj sas o varijanta kata l’ Sofijakê Erlides. Ka 2.12.2015 mêkjla vov kaća ljuma.

Le Demir Alievosko śav o Aljoša mothol, kaj leskê dades sas baro intereso pe l’ paramiča, pe l’ legende thaj pe purani oralno tradicija kata l’ Burgarijakê Řom thaj kata l’ aver Řomengê grupe; vi vov ramosardja paramiča pe bugarijaki śib thaj pařuglja len palal ande Sofijako řomano dialekto kata l’ Erlides kataj řomaji mahala Fakultet. (Le paramiča sas tek publicirime 2017, pala leski moartja). Le Demir Alievoskê bi-publicirime literaturakê buća dja lesko śav la Birgita Igla, kaj sî śibaki naučnica.

(Petra Cech; translacija: Mozes F. Heinschink)

Xainga

O Demir Aliev ramosardja cirka jekh śon angla peski moartja jek maj bute patrjangi avtobiografija pe bugaricko śib, kaj sî kotor kata lesko naslestvo. Le data pa lesko trajosko drom arakhadon ande kado dokumento.

Literatura

Aliev, Demir. 2017. E bengengero kidiba. Sofia: Faber. ISBN 978-619-00-0579-7