O Andras »Beaš« Lakatos kerdilas 1905 ando Máriakálnok (zapadno Ungro) thaj barilas opre ande Pápa. Le Hitleroske manušendar mentondas pe vov thaj lesko čalado bara baxtasa, našimasa. Ando berš 1956 kana le ungrosko nipo xasardas pesko sapačagosko haburovo kontra e rusura, našlas o Beaš peska romnjasa thaj peske šavorenca ando Ostrako. Maškar leske šavora sas vi i Ruža, savi kerdjilas ando berš 1945 thaj savi si adjes i hirešo thaj ašundi djilabatorka Ruzsa Nikolić-Lakatos.

Ando Beči trajijas o Beaš peske čaladosa ando 21-to becirko po Ringelseeplatz ande ‘k vonvago. Leski familija či kamlas te bešel ande ‘k kher, savo kamelas te del le o Flüchtlingshilfe (žutimo e našadengo), ke maj drago sas lenge te trajin e Romenca po Ringelseeplatz ande romano taršošago. Ando berš 1963 sas te muken sa e Rom penge bešimange thana po Ringelseeplatz, ke pe kado than vazdenas e foroske raj jeg baro fürdevo. O Beaš las peske kher ando 22. kereleto thaj trajijas kothe peska familjasa ži po gor peske trajosko. Ando berš 1969 gejlas-tar vov katar kadi luma.

O Beaš vorbijas i šib katar e ungrika Lovara. But Lovara kereškedinas grastenca inke pala dujto lumako haburovo. Maškar e berš 1945 thaj 1956 butjazijas o Beaš ando foro Pápa grastesa thaj vurdonesa. Grasteske vurdonesa ingrelas e gaženge angara. O gavesko trajo e romane taršošagosko sas kecavo hod ivende sako rjat kidenas pe e Rom kethane thaj mothonas paramiči, djilabenas thaj khelenas. O Beaš sas jeg kataj maj laše thaj maj dragi paramičara.

Literatura

Interview mit R.N. In: Stippinger, Christa / Witz, Christa. 1992. Frauen zwischen den Kulturen [Typoskript], Wien, 112-119. Reprint in: Hemetek, Ursula (Hg.). 1994. Amare gila – Unsere Lieder. Eine Dokumentation der Lovaraliedkultur in Österreich am Beispiel der Familie Nikolić-Lakatos (= Tondokumente zur Volksmusik in Österreich 4), Wien, Booklet: p. 6–13.