Jekhe terne manušesko murdaripe
Ko 1. Juni 1942 berš, o Karl Siimann, 14. beršengo sas phanglo kotar e themeski sekcija kotar o than Järva an pesko foro Tapa thaj bičhaldo sas ando phanglipe ko foro Paide, kote so sas phučlno. Vi kodo so kava protokolo naj sas kerdo pe volontarno baza thaj si dendo ando phanglipe, thaj kodoleske naj le bari vakaribaski zor, ba si jekh kotar e numa nekobor dokumentura andar e Estonia , save si phangle e Rromenca thaj si paluni dživdipaski storija vaš jekh terno manuš, savo šaj te na ačhilas dživdo pala o NS mudaripe.
Vi kodo so o Karl Siimann šaj sas te del konkretni detalura vaš oleski bući, e Tapako šerutno, o Jaan Adel, i policijaki asistentica i Karla Tihemets thaj o Lembit Palundi andar e Tapa, savore phende kaj vov »ladžal kotar e buti «, kerel xoli avere manušenge thaj vi phirel tele upre. Inke ko dives kana sas phučlo, o Johannes Randrüüt, prefekto kotar o regiono Järva, dijas komanda o Karl Siimann te phandol, sa dži kaj na delpe ke SD Komandantura. Duj divesa pala kodo avilas e komanda te avel bičhaldo ando Koncentracijako Lager Harku.
E Karl Siimanneski storija si phangli kethanes jekhe bare phanglimaske akcijasa kerdini upral e Rroma ande Tapa, kote so majcera dešuduj Rroma sas phange lesa. Lesko phanglipe sas kerdo jekhvar jekhe direktivasa kotar o Komandanto ando Paide ko 1. Decembro 1941 berš thaj dujtone direktivasa kotar o than Dorpat, kotar o Komandanto pe siguritaki Policija thaj siguritaki institucija ko 14. Februari 1942 berš. Paćalaspe kaj o Karl Siimann sas jekh kotar e 243 Rroma save sas mudarde ando Harku ko 27. Oktobri 1942 berš.
