O Gusztáv (Guszti) Szendrei kerdjilas ando berš 1917 ando foro Budapest. Kote vi barilas opre. Ando berš 1942 musaj sas te solgalij e ketanija ando haburovo taj čak ando novemberi 1945 avilas khere katar o haburovo. Ando berš 1956, kana e rusura aba tele marde le ungroske niposko uštimo, sas te našel peske ande Austrija, ke angažirime sas pe politika. Ando Beči uni Lovara line les opre puterde ileske. Lenca sas lo ando lašo kontakto intrego pesko trajo. Ando berš 1957 pinžardilas peska romnjasa, savi perdal trajisardas e Hitleroske KZ-ura. Voj sarmozijas kataj burgenlandicki Rom. Lasa kethane trajisardas vov de akanara ando Burgenland, ando Neustift bei Güssing. Misto peski bući musaj sas de akanara te ingazij maškar o Beči taj o Burgenland. O Gusztáv Szendrei meklas i luma ando berš 1987.

E Guszteske amala taj savora žene, kon halgatinas leske paramiči taj leske tertenetura, ašarenas leski bari taj fantastično elokvencija. E bečickone Lovarenge sas vo mindig jeg drago vendigo. Vov motholas pestar hod sarmozij kata l’ Rom Poxtanara. Leski romani šibaki varijanta perel pe grupa Vlaxicka romane dialektura taj si jeg šibaki varijanta kataj ungrika Lovara save trajin katar e 1950-utne berš ande Austrija.

Literatura pe kaća sama

Teichmann, Michael. 2012. Der Sprachzauberer: Zwei Seelen in der Brust des ungarisch-burgenländischen Rom und Sprachkünstlers Guszti Szendrei. In: d|ROM|a 35, Herbst | Terno dschend 2012: 3–10.