E Fatima Džaferoska bijandili 1920 ando foro Prilep (Makedonija) kaj sas pe kuća vrjama jeg kotor kata Srpska Kraljevina (thaj de kata o bêrš 1929 jekh kotor la Jugoslavijako). E Fatma barili ando foro Prilep thaj trajilas cirka kata o bêrš 1940 ando foro Beogrado. 1966 avili e Fatima ande Austrija thaj kêrdja i bući ando Beč ande gastronomija. Sar pherdile lakê bućakê bêrš boldja pe e Fatima palpale ando Beogrado. Ando septemberi 1997 mêklja voj ando Beogrado kaća ljuma.

E Fatima źanelas te del duma maj but śiba. Voj źanelas e řomaji varijanta kata pesko dad, kon sas Džambazi, thaj vi e řomaji varijanta kata peski dej arlisko. Paša la makedonijaki śib sićili voj ando Beogrado e srbicko śib; paša sja kodja źanelas vi e balkanicko xoraxani śib sar kaj źanen la źi adjes but muslimanski Řom kata l’ balkanicka thema. Ande Austrija sićili voj v’e njamcicko śib.

Peskê paramiča mothodja e Fatima generalno ande peska dako dialekto, kodja sas le arlisko řomano dialekto kata foro Prilep. Ande akava jugo-balkanicko řomano dialekto arakhas i but turkicka śibakê elementur înkê kataj osmanicko vrjama. Pala kodja arakhas vi but makedonijakê thaj srbicka śibakê elementur ande kaća řomaji varijanta. Pala vuni purane indicka svatur fajdin pe vaj turkicka vaj slavicka svatur, po eksemplo o svato »bordži«: pala doš kata indicko śib si vi bordži kata turkicko śib vaj dugo kata serbicko śib.