Maškar le vêšeskê životinje ašudjol e vjašta, kê le poreznikur kam aven ando voš. But životinje našên, kê kam avel len baro porezo: Le pužur našên, kê von sî khêrengê gazde. Le rode našên-tar anda voš, kê sî len but bare kujbur thaj von trajin „pe ‘k baro punřo“. Le medvedur našên, kê sî len kuč bunde. Savořê len te našên anda voš. Numa le majmunur či našên-tar: Len sî len numa nangê bulja, len naj len khanči, so te len lendar le poreznikur?

Lakrdijakê thaj humoroskê priče sî ande pengo skurcimos thaj ande pengi phirjasaki xarakteristika jeg idealno narativoski medija, te avel sar razonodakê priče bi moralosko pečato, vaj te avel sar medijacija kata moraloskê percepcije thaj trajoskê modur. Le naratorja kata prileposkê Arlije, kata l’ Izmireskê sevlengere Rom (Sepečides) thaj vi kata aver jugo-balkanoskê Řomengê grupe pakjaren butivar peskê moraloskê konceptur ande humoreske.

Skoro svako ašunitori prinźanel o bilaśo haćarimos, kana sî e vorba pa poreznikur thaj o čořimos so šaj anklel lendar. E humoreska »O porezniko avel ando voš« kata o Dragan Jevremović boldel pe direktno karing e publika thaj sîkavel pe ironijakî sama o apsurditeto, te roden poreznikur love pala kasave djele, savendar smatrol o publikumo thaj vi o naratori, kaj sî le jeg fundamentalno trajoski komponenta thaj či na haćaren la sar ‚taksaki obligacija‘. Kodja sîkavel o naratori metaforicko pe sama kata l’ vošeskê životinje thaj phirjasutnes gêtisarel e humoreska le majmunenca kaj naj len khanči aver sar numa lole bulja.

Literatura

Fennesz-Juhasz, Christiane; Cech, Petra; Heinschink, Mozes F.; Halwachs, Dieter W. (ed.). 2012. Lang ist der Tag, kurz die Nacht: Märchen und Erzählungen der Kalderaš / Baro o djes, cîni e rjat: Paramiča le Kaldêrašengê. Klagenfurt: Drava Verlag (Transkript und deutsche Übersetzung / transkripto taj njamcicka translacija / transcript and German translation: 288–91).