E grupa prinďarďi sar Kale & Vjera Bila, has calkom unikatno fenomenos, savo kerdžiľas Rokicanende, andro foros pro zapadne Čechi. Andro berš 1995 pes e grupa le ternenca muršenca jekhvariko andre famelija (Emil “Bišu” Miko, Emil “Pupa” Miko, Jan Dužda, Deziderius Lučka the o Milan Kroka, vaš leske has paľis o Marek Miko) thode pes jekhetane la vokalistkaha Vjera Bila andral e bašavibnaskero klanos pal o Giňas.
Žanros uľiľas
Peskera datar the dadestar pes savore so hin andre grupa sikhade manušengere romane giľa, so sikhavenas pro bini the pro giľade lava paš peskere manušeskere originalne sthoďipena (giľade buter romanes). Ole giľen hin peskre nameta jekhetane temata, kamiben the sakodživeseskere predžiďipena.
O bašaviben Kale defininďas o žanros prindžarutno sar Rom-pop: sofistikovano vokalno harmonija le dzive disonancenca, savorestar čeporo romano manušengero bašaviben, pop the latinsko jazos.
Prikladi reinterpretačna tradicijengera grupakere giľa hin “E kapura” the “Rumuňika” (rumiňiciko čhib).
Andre giľi “Sar me khere avava”, šaj šunas latinsko – brazilsko vplivos.
Kale sar bare čechko eksportos
La grupakero peršo albumos has denas avri tel o nav RomPop (1996). Lengeri dujto nahravka, Kale Kalore (1998), la grupake phundraďas o drom kije maškarthemutno bacht. Pre peskeri bari bacht e grupa bašavelas andro USA, Ňemciko, Rakusko, Francija, Švedija, Izraelija the aver thema.
Andro 90. berša pes pal o Kale & Vjera Bila irinelas andro publikaciji The Guardian abo The Washington Times, so la Vjera Bila lenas vaš e kraľovna pal o romano bašaviben abo la rachinenas la Ella Fitzgeraldovo. Aver simbolis has maškarthemutňi paťiv, o albos la Vjera Bila Queen of Romany has thodo andro britciko than “100 Essential World Music CD”.
Rozgeľipen the zgeľipen
Pal o sako halasišagos pes o Kale andro berš 2005 rozgele la spevačkaha the džanas dijader bije lakero. Kada rozgiňipen pes arakhľas kritikaha pal e sera le dženendar so len rado dikhenas, akana dikhle, hoj e grupa nane cala. O gitaristas Emil Miko phenďas pre kada dijaripen lavenca: “Sam, sar motoris. E Vjera Bila hin značka u Kale hin motoris. Sa umbľoľ perdal kada, so hin bareder le dženenge, so amen šunen.”
Sar peskero projektos dine avri o Kale andro berš 2006 istonaveskero albumos the Šun Kale andro berš 2012 le ľidžatutneha giľošiha le Deziderius Lučka. Pre agoreste pes o Kale rozginde, hoj jekhetane giľavena la Vjera Bila, kamenas te del aver šancija, so ľidžalas kije buteder bachtale koncerta. Aščal o nasvaľiben la Vjera Bila, imar kala bašavibena andre kaja doba na džan dijader.