O Usin Kerim trajilas kata 1928 źi 1983. Lesko anav sî o pseudonimo pala bulgurijako řomano poeto Hyussein Kerim Hyusseinov Mahmudov Bosilkov (Хусеин Керим Хусеинов Махмудов Босилков). La literaturakê kritikarja akharen les »e bliskajilaki řomaji sîrma tala bulgaricko čeri«, von dikhên les sar maj ašundo thaj maj importantno bulgarijako řomano avtoro kata l’ 1960-utne bêrš.
O Usin bijandilo ande plajinako foro Teteven (Centralno Bulgarija) ande ‘k familija kaj maj anglal phirelas thaj pala kodja lja te bêšel thaj te kêrel bući sar kopačengê śinarja. Kaća bući kêrlas v’o Usin. Pala pesko abituro lja pe te kêrel bući sar žurnalisto. Vov ramolas thaj laśarelas artiklur pala diverzni lokalni žurnalur.
Ando bêrš 1955 dja pe ande literaturno scena peska poezijaka kolekcijasa »Песни от катуна« (›Pesni ot katuna‹, ›Gilja kata le nomadongo kampo‹). Kaća poezija sas e angluni kolekcija kata leskê efta poezijakê kolekcije thaj sas entuziastično primime. O Usin sas membro kataj bulgarijakê avtorongi unija thaj barja empatijasa delas dumo e bulgaricko komunistično partija.
De katar o agor kata l’ 1950-utne bêrš ankêrlas e komunistično Bulgarija jek desja restriktivno politika kontra e ekspresija kata ‘k řomano identiteto thaj kontra jek publikaki prezentacija la řomaja kulturaki thaj v’e řomaji śib sas zabranime. Vi te sas o oficialno konteksto pe kaća sama kontraproduktivno, pale prinźande sas le cîřa řomane artistur thaj kulturakê bućara řomaja řêdêčinasa ande Bulgarijaki kulturaki scena sar Řom ka peskê kolegur thaj vi generalno ande publika. E řomaji kultura thaj tradicija sas jek desja zuralo kotor katar lengi artisticko producija.
Jek baro kotor katar le Usinoskê buća sî direktno phanglo leskê trajosa ande řomaji mahala thaj leskê etno-kulturalnone xarakeristikenca le řomane društvoskê. Sar paćarno komunisto, ašardja o Usin ande peski poezija le uspexur kata la kumunistengi partijaki politika karing le Řom, po egzemplo o obezbedjenje kata bêsimaskê thana, o pîterdo drom karing e edukacija thaj karing e bući.
Le Usinoskê delur sî publicirime pe řusicko, rumunicko thaj čexicko śib, numa vuni katar leskê poemur sî nakhade pe řomaji śib. Jek bêršeski kompeticija palaj bipublicirime poezija kata o »Usin Kerim« organizuil la bulgarijaki řomani publikacijaki agentura »Drom Dromendar«.
(Translacija: Mozes F. Heinschink)
Alome Bibliografija
Керим, Усин. 1955. Песни от катуна. София: Български писател. [Kerim, Usin. Pesni ot katuna. Sofia: Bălgarski pisatel.]
Керим, Усин. 1959. Очите говорят: Стихове. София: Български писател. [Kerim, Usin. Očite govorjat: Stihove. Sofia: Bălgarski pisatel.]
Керим, Усин. 1968. Под синия шатър: Стихове. Варна: Държавно издателство. [Kerim, Usin. Pod sinija šatăr: Stichove. Sofia: Dăržavno izdatelstvo.]
Керим, Усин. 1969. Заю Баю и орача. София: Български художник. [Kerim, Usin. Zaju Baju i orača. Sofia: Bălgarski hudožnik.]
Керим, Усин. 1978. С бащиния глас. София: Български художник. [Kerim, Usin. S baštinija glas. Sofia: Bălgarski hudožnik.]
Керим, Усин. 1987. Халище: Стихотворения. Пловдив: Христо Г. Данов. [Kerim, Usin. Halište: Stihotvorenija. Plovdiv: Hristo G. Danov.]
Керим, Усин. 1998. Кон жадувам. Избрани стихотворения и непубликувани творби. Шумен: Славчо Николов и сiе. [Kerim, Usin. Kon žaduvam: Izbrani stihotvorenija i nepublikuvani tvorbi. Šumen: Slavčo Nikolov i sie.]
Керим, Усин. 2003. Лирика. София: Народна култура. [Kerim, Usin. Lirika. Sofia: Narodna kultura.]