E Sali Ibrahim (Сали Ибрахим, Снежана Иванова / Snezhana Ivanova) bijandili ando bêrš 1950. Voj sî jek bulgarijaki Řomni katar la Sofijake Erlije andaj řomaji mahala »Fakulteta«. Kaća mahala sî jek mahala katar le maj bare řomane mahale po Balkano. E Sali ramol peski poezija vi pe řomaji śib thaj vi pe bulgaricko śib. Voj sî avtorka kata oxto poezijakê knjige. Voj dikhêl pe sar bulgarijaki avtorka řomane řêdêčinenca. Importantno sî lakê te perel laki literatura pe bulgarijaki scenerija.

Aj čačimasa, e Sali sî e angluji bulgarijaki Řomni kaj publicirisardja korkoři pesko poezijako kidimos thaj kaj angažirisajli ande la literaturakê mainstream-oskê krugur: Voj sî membro kataj bulgarijakê avtorongi asocijacija; peskê anglune poezijakê kolekcije publicirisardja ka mainstream-oskê edicijakê khêra; angažirime sî voj vi ande l’ informalni literaturakê krugur kata ašunde bulgarijakê avtorur, sar kaj sî kodja po egzemplo o Radoy Ralin, kaj sî disidento, poeto thaj satiričari.

Sar le maj řomane avtorur, angažirisardja pe v’ e Sali sar aktivista pala l’ Řom pe nacionalno sama thaj vi pe maškar-themutni sama. Vi te sî lako aktivizmo specifično ciljome palaj promocija kataj řomaji literatura thaj řomaji kultura, participirisardja voj vi ande parlamentoski bući kataj Internacionalno Romani Unia (IRU), thaj angažirisajli vi pe organizacija kata řomane thaj politikakê reprezentatongê maladjimata (jek politikako reprezentanto maškar lende sas la Bulgarijako presidento, Petar Stoyanov, kaj sas presidento kata 1997 źi 2002).

E Sali sas vi šêrutni editorka kata o žurnalo »Gypsy Rai/Romano Devleti« (publicirime 1998) thaj kata o žurnalo »Romance« (publicirime 2005), voj sas direktorka kata kulturako centro »Elit« kaj formirisajlo 2002 ande Fakulteta thaj šêrutni specijalista ande la Sofijaki komuna (2000–2006). Sar řomaja kulturaki promotorka pe maškar-themutno levelo prezentirisardja voj řomane avtorur kataj antrego ljuma, ande l’ žurnalur kaj delas avri.

E šali ramol pe duj śiba, pe bulgaricko śib thaj pe řomaji śib, numa le maj but buća kaj ramosardja thaj publicirisardja sî pe bulgaricko śib. Lakê poemur nakhade sî, pala řomane poezijakê kolekcije, ande španiolicko, poljcicko thaj srbicko śib.

(Translacija: Mozes F. Heinschink)

Alome bibliografija

Ибрахим, Сали. 1993. Космична любов. София: Литературен форум. [Ibrahim, Sali. Kosmična ljubov. Sofia: Literaturen forum.]

Ибрахим, Сали. 1993. Гривна за Ева. София: Литературен форум. [Ibrahim, Sali. Grivna za Eva. Sofia: Literaturen forum.]

Ибрахим, Сали. 2001. Короната на битието. София: Scorpion. [Ibrahim, Sali. Koronata na bitieto:. Sofia: Scorpion.

Ibrahim, Sali. 2004. Romani mitologiya. Sofia: Elit.

Ibrahim, Sali. 2009. Цигански видения. Романе елпиня. Ciganski videnija. Romane elpinja. Sofia: Elit.