O Mehmed »Meho« Saćip (1944–2015) sas jek Arlisko Řom katar o foro Gnjilane/Kosovo. Kana buhlile etnički kotroverze ando Kosovo ande 1990-utne bêrš, o Mehmet munčisajlo pe aver regijonur kataj demîltuji Jugoslavija, thaj po gor munčisajlo ande Subotica/Srbija.

O Meho sas desja integririme ande źuvindo, řomano kulturako thaj socialno trajo le Kosovosko. Katar le 1980-utne bêrš publicirisardja vov panź poezijakê kolekcije thaj (kethane le Alijasa Krasnići) ankaladja jek antologija řomaja poezijaki. Ande l’1980-utne bêrš sas lo jek kata l’ anglune řomane avtorur, kaj publicirisarde kontemporarno poezija pala řomane śavořê: »Loli phabaj – Crvena jabuka«.

O Mehmed Saćip sas jek pioniri pala řomano žurnalizmo. Ande 1980-utne bêrš sas lo spikeri ando Kosovo thaj editoro kata prvo radiovosko programo pe řomaji śib. Paša sja kodo formirisardja vov jeg řomano teatrosko ansamblo kaj sas les karing 100 membrur. O Mehmed nakhadja klasični teatroskê kotora pe řomaji śib thaj ramosardja vi teatroski muzika.

(Translacija: Mozes F. Heinschink)

Alome bibliografija

Saćipeso, Mehmed. 1984. Bučarne vasta – Vredne ruke. Gilana: Prosveta.

Saćip, Mehmed. 1995. Sofrako Miškuipe. Pomeranje sofre. Priština: Novi svet.

Saćip, Mehmed. 1998. Mirikle. Gnjilane: Radio Gnjilane/ Centar kulture Zarija R. Popović/ Narodna biblioteka Janko Veselinović.

Saćip, Mehmed. 2004. Kalendar. Subotica: Kulturni centar Roma.