O Marian Ghiţă bijandilo ka 9. decembro 1976 ando foro Craiova ando regiono Dolj Romania. O Marian studirisardja agronomija thaj sociologija thaj gêtosardja peskê studije la diplomasa »Master’s degree« paj tema »Razvojo le društvosko thaj Evropaki integracija«.
De katar o bêrš 2005 sî lo aktivisto ando řomano miškimos. Vov sî vi membro kata l’ źene, kaj formirisarde le Řomengo têrnimatango centro »Amaro Suno«. Amaro Suno angažiril pe pala društvosko razvojo, pala l’ manušengê čačimata , pala l’ civilni inicijative thaj palaj edukacija thaj kultura. Katar 2007 źi 2015 kêrdja vov bući sar eksperto ande regionalno administracija kataj nacionalno agencija pala le Řom ande južno-zapadno Oltenija.

O Marian ramosardja vuni poezijakê knjige. Leski kolekcija »Șoaptele mâinii drepte« [›O pupuimos katar o čačo vas’] lja o angluno than ka kontesto pala debijoski literatura, kaj sas organizuime kata o publikacijako khêr »Lumen«, kaj publicirisardja vi kaća bući ando bêrš 2007. Pala kodja, ando bêrš 2011 ankaladja vov jek dujto kolekcija anavesa »Durematica«, savi sas pe do śibende (pe rumunicko śib thaj pe řomaji śib). Kaća kolekcija lja o angluno than ka la publikacijako kontesto kataj kampanja »Art without Color« (›Arta bi farbako‹). Kaća kampanja formisardja la kulturako ministerijumo pa Nacionalno Centro pala Řomengi kultura. Desja uspešno sas vi leski paluji publikacija, le anavesa »Matematica sufletului« (›E matematika le djijesko‹), publicirime 2017, kaj pale njerisardja la literaturako kontesto, organizuime kata o Nacionalno Centro palaj Řomani Kultura – Romano Kher.

Paša kadala pomenime literaturakê kontestur lja o Marian Ghiţă vi maj duj paćiva, 2004 thaj 2005, thaj njerisardja la literaturako kontesto ›Numa o poeto‹. O kontesto organizuisarde le studentur kata o kulturako khêr Craiova, ande kooperacija la unijasa kata studentongê organizacije.

(Translacija: Mozes F. Heinschink)

Literatura

Ghiţă, Marian. 2007. Șoaptele mâinii drepte. Iași: Lumen.

Ghiţă, Marian. 2011. Durematica. Bucureşti: Romano Kher.

Ghiţă, Marian. 2017. Matematica sufletului. Bucureşti: Romano Kher.