E Maja Familić (bijandi 1973) sî jek Gurbetka andar o foro Novi Sad (Srbija). Vov sî poetesa, slikarka thaj vi sîćaritorka ande škola. Sar vi but aver řomane avtorur po Balkano sî vi voj laśes intregririme ande Srbijaki literaturaki scena thaj vi ande scena katar e puraji, demîltuji Jugoslavijaki federacija. Laki karijera sar poetesa teljardja laka participacijasa ka l’diverzni nacionalni kompeticije thaj festivalur thaj la publikacijasa katar lakê buća ande literarni žurnalur, aj kodja ande l’ regionur katar e demîltuji jugoslavijaki federacija. Pe isto vrjama sî voj vi jek membro katar o srbicko avtorongo thaj artistongo društvo. Le teme katar laki artističko literaturaki thaj slikarstvoski bući sî phange la řomaja kulturasa, la řomaja historijasa thaj le řomane identitetosa. E Maja publicirisardja diverzni poezijakê kolekcije. Jek kolekcija latar sî e trine śibengi edicija »Kad mrtvi propevaju / Kana e mula đilaben / When the dead start singing« (Familić 2015). Kaća edicija sî śinadi le řomane holokaustoskê viktimongê.

(Translacija: Mozes F. Heinschink)

Lila

Familić, Maja. 2011. Ćup nadanja / Khoro ažućarimasko. Novi Sad: Udruženje Roma Veliki rit.

Familić, Maja. 2013. O dosto ćheresko / Domaćinski gost / Homely guest. Novi Sad: Fondacija “Nomadik”.

Familić, Maja. 2015. Kad mrtvi propevaju / Kana e mula đilaben / When the dead start singing. Novi Sad: Fondacija “Nomadik”.