E Gordana Djurić (Đurić) bijandili ando bêrš 1958 ande centralno Srbija, ando gav Draginje. Sas la baro literaturako talento već kana sas têrni śej, atunči publicirisardja voj peskê literarni buća ande žurnalur thaj ande literaturakê kolekcije kata têrne thaj talentovani Jugoslavijakê avtorur.

E Gordana sas e angluji Řomnji ande Jugoslavija, kaj publicirisardja peski poezijaki kolekcija. Peskê poemur sas publicirime pe řomaji śib taj pe srbicko śib 1989 le titulosa »Dukhaldo ilo« ando ašundo ›Društvo palaj řomaji śib thaj kultura ande Vojvodina‹ ando Novi Sad (Srbija).

Pe jeg rig sas voj desja integririme ande la srbijaki literaturaki scena, voj participisardja ka l’ diverzni poezijakê recitacije, participisardja ande l’ avtorongê klubur thaj ande literaturakê cirklur. Pe kaver rig sas laki literaturaki ljuma zurales phangli la řomaja kulturasa. Peskê poezijakê tekstura ramosardja voj generalno řomanes, vi te sas lengi tematikaki sama universalno.

E Gordana mêklja pe tragično sama akaja ljuma ando Kosovo ando bêrš 1999, kaj mundarde la albanijakê ekstremistur. Čak lakê palune trajoskê časur sas phangle lakê literaturakê trajosa. Voj muli kana sas voj po drom pala poezijaki recitacija ando foro Gračanica.

(Translacija: Mozes F. Heinschink)

Bibliografija

Ðurić, Gordana. 1989. Dukhaldo ilo. Ranjeno srce. Novi Sad: Društvo Vojvodine za jezik i književnost Roma.